وبعد جاهين ايه يتقال
في حب مصر تغنى ومال
مصر يا ارض يا شمس يانيل
يا اجمل ناس واروق ليل
من كتر ما قالوا فيكي كلام
قلبي في حبك غنى ومال
وفكروني بحبيبة قلبي
الي هواها بيجري بدمي
الشمس تشرق عشان عيونها
وقمر الليل بيحرس شجونها
حبيبتي عروسة بفستان ابيض
قامت عشانها قيامة الفرسان
لكن عروستي مهرها غالي
لاكنز الارض ولا نجم السما العالي
ولا حتى القمر وهو بدر بيلالي
حبيبتي في عينيها بريق الماس
ورقة الضحكة وحب الناس
ولمعة براقة تغيّب الاحساس
افديها بالروح ورمشي ليها مداس
وقلبي على كفي هدية ليها خلاص
وعمري ليها وهبتو..ايامو ليها حراس
حبيبتي هناك
سهيت عيون حراسها
وفي ليلة القمر غاب عنها
خطفوها ولاد التايهة
اخدوها من حضن ولادها
غربوها عن اخواتها
لكن حبيبتي مهما الزمن طال
راسها مرفوعة تهد جبال
واحنا بعون الله اجيال ورا اجيال
نرجع لها الضحكة نكسر الاغلال
ونصلي في ارض الطهر
ونبوس ترابها
ونطول عنبها
ونطهرها
من ولاد التايهة
حبيبتي دي امي وبنتي واختي
اسقي ترابها بدمي
واروي عطشها بدمعي
حبيبتي مكللة بالغار
كل العيون عليها كبار وصغار
لكنها بعيدة .. ابعد من الشمس وسط السما
تنور الدنيا بنورها وهي النار
حبيبتي ضفايرها بلون الليل
طفلة بتتنطط من ميل لميل
وقلبي بيتنطط معاها وهو ليها دليل
ولما تيجي تنام عيني ليها سرير
ورمشي يغطيها ويقول لها المواويل
حبيبتي لو هافضل اغني فيكي واقول
سنين عمري وعمر ولادي ومهما الزمن هيطول
انا حبي ليكي اكبر من السما والارض
وهافضل اغني واقول فيكي ليوم العرض
حبيبتي دي امي واختي وبنتي
حبيبتي دي عرضي وناسي واهلي
حبيبتي دي ارضي وبلدي ووطني
حبيبتي دي فلسطين
(المقصود بشاهين صلاح شاهين الشاعر المصري
وهي بالعامية المصرية لشدة التاثر بالشاعر)
